Por un lado, un tributo ao saxo alto. Por outro lado, un formato de orquestra moderna de jazz. Con eses vimbios, Roberto Somoza (Londres, 1971) constrúe o seu cuarto traballo como líder, The Vanguard (Xingra, 2009), que vai presentar no 6º Festival de Jazz de Vigo Imaxina Sons.
Con algúns dos mellores músicos do país, Somoza segue medrando e presenta unha selección de composicións orixinais cunha pequena orquestra cimentada na suma dun formato de cuarteto máis unha sección de metais. Creatividade e frescura que se poderán gozar nese club de jazz ao aire libre que será a Praza da Constitución durante o festival.