Novas

3.07.10 Dave Douglas Quintet clausura a sexta edición de Imaxina Sons

“O jazz está vivo, é vibrante e é vital”. Quen así fala é un dos músicos máis prolíficos, destacados e convencidos do jazz actual en todo o mundo. Dave Douglas (New Jersey, EUA, 1963), o renomeado trompetista e compositor, considera que o poder da música está por riba das palabras e que, se ben o seu é un traballo persoal como ten que ser o de calquera músico, non deixa de estar conectado coas preocupacións e inquedanzas que moven o mundo. Dúas veces nominado aos Grammy, Dave Douglas será o encargado de pechar o domingo 4 ás 22h no Centro Cultural Caixanova a sexta edición do Festival de Jazz de Vigo Imaxina Sons co seu quinteto, un dos seus proxectos máis maduros co que percorre un amplo abano dos sons jazzísticos contemporáneos.

Hiperactivo e rebordante de bo humor, Dave Douglas é considerado por parte da crítica como o jazzista americano máis europeo; o trompeta, porén, renega de etiquetas ao crer que encorsetan e limitan aos músicos e, aínda que sempre conciliador, é teimudo na defensa da vitalidade do jazz norteamericano. ¿Que dicir dun jazzista que non ten reparos en admirar –e até revisitar ou colaborar con eles- a artistas como Radiohead, Björk ou Tom Waits? Pois o que el mesmo di: “Pretendo continuar crecendo e teño unha curiosidade insaciable pola música”. Dave Douglas Quintet é un dos seus proxectos máis tardíos, tamén un dos máis duradeiros e estables. Arrincar con esta formación supuxo para el un desafío xa que o seu labor de composición e interpretación requiría del un rol diferente que o exercido noutros proxectos anteriores nos que, paradoxalmente, a complexidade instrumental e a variedade de personalidades musicais tiñan maior dimensión. The Infinite (Bluebird / RCA, 2002), o primeiro álbum do quinteto, foi nominado aos Grammy como mellor disco instrumental de jazz; despois virían Strange Liberation (Bluebird / RCA, 2004) coa colaboración do guitarrista Bill Frisell e Meaning and Mistery (Greenleaf Music, 2006). Sen dúbida, a presenza de Uri Caine (Philadelphia, EUA, 1956) no quinteto de Douglas será celebrada pola audiencia do Imaxina Sons. Caine é un dos mellores pianistas de jazz, cun traballo caracterizado polo seu achegamento á música culta e a compositores como Mahler, Bach e Beethoven e con máis de quince discos como líder, entre eles o aclamado Toys (JMT 1995, reeditado en 2005) no que tamén colaborou Dave Douglas.