Novas

27.06.09 Cubertas as prazas para a clase maxistral de Fred Frith

Debido ao número de persoas xa inscritas a través da web do Festival de Jazz de Vigo Imaxina Sons, a clase maxistral que o guitarrista e compositor Fred Frith impartirá o vindeiro martes 30 no Conservatorio Superior de Vigo ten xa cubertas as prazas dispoñibles. Lembrámosvos que aínda está aberto o prazo de inscrición para a segunda master class do festival que terá lugar o sábado 4 de xullo de 11 a 13.30h da man do trombonista Nils Wogram. O músico alemán, nacido en 1972, é unha das novas e reputadas figuras do jazz europeo e nesta edición de 2009 de Imaxina Sons integra a formación de Lucas Niggli cun concerto o sábado 4 de xullo no teatro Salesianos.

En diferentes formacións, Nils Wogram ten participou nos máis importantes festivais europeos e con Root 70 xirou por todo o mundo. A súa actividade discográfica nos últimos tempos tamén é intensa: en 2008 gravaba con Root 70 o cuarto disco desta formación, titulado On 52nd 1/4 street, un directo con arume a Nova Orleans, e recentemente, neste mesmo ano, editaba coa banda Lush o disco Pretty Good News (Unit Records). Nils Wogram consegue que o trombón soe dun xeito non contemplado até agora no mundo do jazz, ese é o seu selo e o que provoca que crítica e público sigan de perto a súa traxectoria desde hai máis de dez anos. Da súa técnica brillante e versatilidade, así como dun certo gusto vintage que se pode apreciar nas súas gravacións, serán testemuñas directas aquelas persoas que participen da clase maxistral do trombonista.