Novas

24.06.09 Charles Lloyd abre o 5º Festival de Jazz de Vigo Imaxina Sons

Comeza xa o 5º Festival de Jazz de Vigo Imaxina Sons o xoves 25 de xuño e faino cun concerto en exclusiva do saxofonista norteamericano Charles Lloyd (Memphis, EUA, 1938) no Teatro-sala de concertos Centro Cultural Caixanova ás 22h. O músico chega ao Imaxina Sons, festival promovido pola concellería de Cultura e Animación Sociocultural, cun concerto baseado no seu último traballo discográfico Rabo de Nube (ECM Records, 2008). Pasa por ser o primeiro músico de jazz en vender un millón de discos co album Florest Flower, gravado en directo no festival de Monterrei en 1966. Tamén por ser o primeiro jazzman estadounidense que fai unha xira pola Unión Soviética con parada en Moscú un ano despois. Para a crítica estadounidense, a reaparición de Lloyd liderando un cuarteto con este novo traballo pon de manifesto dúas cousas: que con setenta anos o músico non perdeu o seu gusto pola experimentación e que esta formación é unha das mellores que ten liderado o saxofonista na súa longa carreira.

Un inicio de luxo para un festival, o Imaxina Sons, centrado no jazz europeo e que chega a súa quinta edición mantendo os seus obxectivos: atender as demandas das e dos afeccionados, servir como escaparate do jazz máis próximo e vangardista, acadar a implicación da cidadanía e captar a atención da crítica especializada. En 2009 Imaxina Sons propón un programa no que está representada sobradamente a xeración de músicos que fixeron do jazz europeo o espello no que o jazz mundial tivo que ollarse durante os últimos trinta anos. A destacar tamén o papel do jazz galego no programa de Imaxina Sons no que, sen complexos, volta a ter un papel protagonista nesta edición. Nomes xa con longo percorrido comparten cartel coa nova fornada jazzística do país.

Pero como toda regra contempla algunha excepción, o festival Imaxina Sons inclúe habitualmente no programa a algúns dos grandes nomes do jazz norteamericano. E nesta quinta edición o mestre do outro lado do Atlántico é Charles Lloyd, arroupado por unha formación que reborda calidade e que integran Jason Moran no piano, Reuben Rogers no contrabaixo e Eric Harland na batería. Xuntos dará unha actuación exclusiva en toda a península. Lloyd deixou aos dezaoito anos Memphis polos Ánxeles, onde durante o día estudaba música clásica e pola noite acompañaba nos clubs a músicos como Ornette Coleman ou Don Cherry. Ao longo dos anos sesenta dirixiu o grupo de Chico Hamilton, mergullouse na escena neoiorquina colleitando a amizade doutros mestres como John Coltrane, Thelonius Monk ou Miles Davis e integrouse no Cannonball Adderley Sextet durante un ano antes de formar o seu propio cuarteto. Nos últimos vinte anos, e ligado á compañía ECM, gravou trece discos e continúa xirando por todo o mundo. Rabo de Nube, o seu último disco, inspirouse na canción do mesmo título do músico cubano Silvio Rodríguez.

• 1
• 2